Orfandá ye l poemariu de la devastación: la que produz la muerte del padre, non por esperada menos doliosa; la devastación que produz la crueldá de l ausencia; pero sobre manera ye la devastación de saber qu esa conversación aplazada que delles veces ye la vida nunca nun va dase, nin tan siquier siendo posible que se diera. Orfandá son trenta y cuatro poemes densos, pétreos, milimétricos, conteníos, que son a llevanos del dolor a la redención, del tiempu de la infancia a la madurez y, delles veces, a la rebeldía y la vergoña de siguir andando como si nada, como si l rayu del dolor y de la muerte nun nos tuviera firío.